Sarean Euskaraz 2026

Egun euskaraz eskura ditugun sorkuntza eta baliabide digitalak ezagutzeko gonbidapena luzatzen die SAREAN EUSKARAZek gazteei. Gurea etorkizuneko hizkuntza bizia izan dadin; Informazioaren eta Komunikazioaren Teknologiek (IKT) gure hizkuntza hitz egin dezaten; eta gure gazteak etorkizuneko lanabes digital berrien garatzaile eta eduki sortzaileak izan daitezen.

Hain justu, euskal ekosistema digitala elikatzen diharduten profesionalek gidatzen dituzte SAREAN EUSKARAZ programaren jarduera guztiak: ERAGIN komunikazioa, TALAIOS kooperatiba, ELURMALUTA proiektu artistikoak, GISA software librearen aldeko elkartea, EMAIZE sexologia zentroa, CODESYNTAX, PROTOMAKERS club, KATUBI ikus-entzunezkoak, GAME ERAUNTSIA euskarazko bideojokozaleak eta Dj MAKALA, besteak beste.

Iruñako Baluarte Jauregian SAREAN EUSKARAZ jardunaldiak hiru egunez Nafarroa osoko DBHko 4. mailako D ereduko ikasleentzat goiz osoko eskaintza paregabe eskaintzen du: lantegiak, hitzaldiak, jokoak, zozketak eta zuzeneko musika euskal kultura digitalaz gozatzeko!