Wilburren akrobaziak eta umoreak MUAK 2026ra iritsiko dira irailaren 20an

MUAK 2026 Komedia Erakustaldiak bere programazioarekin jarraituko du irailaren 20an (12:30ean), umorea, akrobazia eta arriskua uztartzen dituen proposamen batekin. Zehazki, Baluarteko Areto Nagusiak Piensa en Wilbur ikuskizuna hartuko du, Wilbur izen artistikoaz ezaguna den Víctor Ortiz protagonista izango duen bakarkako ikuskizuna. Ezinezko akrobaziak, egoera zentzugabeak eta umore dosi handiak dira arriskua jokoaren parte den proposamen honen osagaiak.

Komedia Erakusketaren seigarren proposamen honetarako sarrerek 15 euroko prezioa dute eta Baluarteko txarteldegian eta NICDOk La Morea merkataritza-gunean duen informazio eta salmenta-putuan eskura daitezke. Online ere eskuragarri daude, www.baluarte.com webgunearen bidez, 17,5 euroren truke (kudeaketa-gastuak barne). Gainera, Sarrera Irisgarriak (MUPak eta PDSak) erosteko aukera dago.

Piensa en Wilbur Víctor Ortizen lehen bakarkako ikuskizuna da, eta denborarekin hazten joan den proiektua, bere proposamen ezagunenetako bat bihurtu arte. Trebetasun fisikoa, umorea eta arriskua uztartzeko duen modu bereziak sare sozialetan ere ikusleen arreta bereganatu du; izan ere, bere akrobaziek 900.000 jarraitzaile baino gehiago dituzte Instagram eta TikToken artean.

Ezohiko teknika eta fisikoa baliatuz, Víctor Ortizek dena posible dirudien espazio bihurtzen du agertokia. Bere lagun banaezinak diren Contractura, Tirón eta Desgarro pertsonaiek lagunduta, bere unibertso bereziaren parte diren hiru pertsonaiek, Wilburrek erakusten du akrobazia kirol-diziplina bat baino askoz gehiago izan daitekeela: ikusleak barrez eta harriduraz betetzeko tresna indartsua ere bada.