Iruñeko Gazte Orkestrak Gabonetako kontzertua eskainiko du Baluarten abenduaren 28an

Baluarteko Ganbera Aretoak Iruñeko Gazte Orkestraren (JOP/IGO) kontzertua hartuko du abenduaren 28an, eguerdiko 12:00etan, JOP in Blue izenburupean. Familia giroko emanaldia izango da, erritmo eta energiaz betea, eta George Gershwinen Rhapsody in Blue pieza ospetsua omenduko dute. Mirari Etxeberria eta Roman Degtiarev-en batutapean, JOP in Blue kontzertuak musika klasikoa eta jazza uztartuko ditu formatu desberdinetan, hala nola orkestra sinfonikoa eta big band-a, Nafarroako eta inguruko 14 eta 30 urte bitarteko 70 musikari gazteren eskutik.

Sarrerak 12,95 eurotan ohiko kanaletan eskura daitezke: www.baluarte.com webgunean, Baluarteko txarteldegian eta NICDOk La Morea merkataritza-gunean duen informazio eta salmenta puntuan.

Programa Mirari Etxeberriaren zuzendaritzara zabalduko da Maurice Ravelen Alborada del Gracioso lanarekin, eta, ondoren, XX. mendeko obrarik enblematikoenetako bat: George Gershwinen Rhapsody in Blue. Jonathan Milla pianistak parte hartuko du bakarlari gonbidatu gisa. Amaitzeko, JOP Big Band sortu berriak —kontzertu honetan ofizialki estreinatzen den talde independente batek— big banden errepertorio propioa interpretatuko du, Roman Degtarieven zuzendaritza artistikoaren pean.