Eliades Ochoak musika kubatarra Baluartera ekarriko du urriaren 31n

Kubako sonero ezagunenetako bat eta bere belaunaldiko gitarra-jotzailerik onena den Eliades Ochoa Baluartera iritsiko da heldu den urriaren 31n (20:00etan). Santiago de Cubako musikariak zuzeneko kontzertua eskainiko du Areto Nagusian, Europa, Estatu Batuak eta Mexikoko hainbat hiritan egingo duen ¡Como nunca! mundu mailako biraren baitan.

Sarrerak 40, 45 eta 50 eurotan Baluarteko txarteldegian eta NICDOren informazio- eta salmenta-gunean, La Morea merkataritza-gunean jada salgai daude. Halaber, online ere eskuragarri daude, www.baluarte.com webgunearen bidez, 40,95 / 45,95 eta 50,95 eurotan (kudeaketa-gastuak barne).

Bost hamarkadatik gorako ibilbidea izan du Eliades Ochoak, eta sonaren, guajiraren, guaratxaren eta boleroaren enbaxadore handienetako bat izan da. Kuba bere jaioterritik nazioarteko agertoki nagusietara eraman ditu genero horiek. Buena Vista Social Club-en parte hartu izanak ospe globalera eraman zuen, bere proiekzio artistikoan mugarri bat ezarriz. 1999 eta 2000 artean, Grammy sarietarako izendatu zuten Latinezko Interpretazio Tropikal Onenaren kategorian eta Oscar sarietarako Buena Vista Social Club dokumentalean.