Otsailaren 24tik martxoaren 1era ospatuko den XIX. Punto de Vista Jaialdirako sarrerak salgai daude jada

Otsailaren 24tik martxoaren 1era izango den Punto de Vista Nafarroako Zinema Dokumentaleko Nazioarteko Jaialdiaren XIX. edizioarako sarrerak salgai daude jada. Proiekzioetarako sarrera bakoitza 3 eurotan eskura daiteke, www.baluarte.com web-orrian eta Jaialdiaren www.puntodevistafestival.com web-orrian, Baluarteko txartel-leihatilan eta NICDOk La Morean duen informazio- eta salmenta-gunean. Gainera, Jaialdiak irauten duen bitartean Baluarteko atondoan ere erosi ahalko dira.

Aurten ere, Punto de Vista jaialdiak espazio estimulatzaile eta aktiboa proposatzen du ez-fikziozko zinemaren azken joerak ezagutzeko eta ikus-entzuneko praktika berriei buruzko gogoeta egiteko. Sail Ofiziala hamar film luzek eta zazpi film laburrek osatzen dute eta mundu mailako lau estreinaldi, nazioarteko lau estreinaldi, Europa mailako estreinaldi bat, Espainia mailako zazpi estreinaldi eta Nafarroako estreinaldi bat izango dira, zinemagile hauen eskutik, besteak beste: José Luis Sepúlveda eta Carolina Adriazola (Cuadro negro), Emilio Hupe (El viento que golpea mi ventana), Ramón Balcells (A.), Wonwoo Kim (Writing Poems at the End of the World) edo Maddi Barber eta Marina Lameiro (Cambium). Fokuak atalean, bi atzerabegirako egingo dira, Herbeheretako Frans Van de Staak (1943-2001) eta Frantziako Anne-marie Faux zinemagileen obrarenak. Horrez gain, Miriam Martín programatzaile eta zinemagileak azken lau urteotan ingurune naturalari eskaini dion sail baten entrega berri bat izango dugu, kasu honetan Adiós a los animales izenekoa. Lan atalari dagokionez, jaialdiaren inaugurazio saioan Kataluniako Filmotekak berriki digitalizatu duen eta arestian aipatu dugun Miñuca Villaverderen Tent City lana emango da. Termitas sailak, berriz, eszena sortu berri nazionala zertan den eskainiko du; eta, gainera, zinema dokumentalari aplikatutako adimen artifizial sortzailearen praktika alternatiboei buruzko bi hitzaldi ere egingo dira.

Kontaktuak atalak Iñaki Garmendiaren bideo instalazio bat aurkeztuko du Zitadelan. Gainera, artistarekin elkarrizketa bat egingo da, Oteiza Museoak eskaintzen dion erakusketaren esparruan. X Films atalak, berriz, Huarte Zentroarekin lankidetzan, Pablo Casanueva zinemagile eta sortzaile bisuala gonbidatuko du egonaldi artistikoa egitera, 2025ean Nafarroan grabatzeko entsegu dokumentalaren proiektu bat garatzeko. Bestetik, Celia Viada Casoren 2024ko X Films proiektuaren mundu mailako estreinaldia egingo da: Volver a casa tan tarde. Azkenik, Punto de Vista jaialdiak Iruñeko publiko gazteenari ere irekiko dizkio ateak, Bitartekaritza Programaren (haurrentzako bi tailer antolatuko ditu), Gazte Programatzaileak sailaren beste edizio baten, familientzako zinema saio baten eta Nafarroako Filmotekan egingo diren batxilergoko ikasleentzako beste bi saioren bitartez.

Bestalde, kontziliazioaren alde eginen dugu, aurten ere, jaialdian, Punto de Vista ludotekarekin: Puxika Gorria. Horrela, publiko orokorrak eta akreditatutako pertsonek otsailaren 27tik, osteguna, martxoaren 1era, larunbata, sei hilabete eta hamabi urte bitarteko haurrentzako espazio bat dute. Plazak erreserbatzeko eskaera egiten ahal da jada webgunearen bitartez.