Iruñeko Baluarten bere jarduera berreskuratuko ditu, izan ere urriaren 1ean gurean Denboraldia inauguratu zuenetik ezin izan baitu emanaldirik eman Covid-19arekin lotutako murrizketen ondorioz. Zehazki, Euskadiko Orkestrak kontzertu bikoitza eskainiko du urtarrilaren 19an, asteartearekin, arratsaldeko 18:00etan eta 20:15ean Areto Nagusian, bere zuzendari titular Robert Treviñoren batutapean. Kontzertu-programa honetako bakarlari gonbidatu Behzod Abduraimov pianistak bere parte-hartzea bertan behera utzi du eta, ondorioz, Euskadiko Orkestrak saio bakoitzeko programen lehen zatia aldatu egin behar izan du. Programa bakoitza Mozarten eta Sibeliusen sinfonia banaz osatuko da. 

 

Programa bakoitzaren lehen zatian Wolfgang Amadeus Mozarten heldutasuneko sinfonia bana interpretatuko da: 36. eta 41. sinfoniak. Batetik, 36. Sinfonia 'Linz' ezizenez ezagutzen da Mozartek bost egunetan idatzi zuelako Austriako hiri horretan. Bestetik, Mozarten sinfonia ezagunenetako bat eskainiko da, 41. Sinfonia, 'Jupiter' deitua, bere 40 sinfonietako gailurtzat jotzen dena.

 

Kontzertuen bigarren zatian, Jean Sibeliusen bi sinfonia entzun ahal izango dira, Robert Treviñok aukeratu dituenak Denboraldiaren gai nagusiarekin jarraitzeko asmoz, Erromantizismoarekin, alegia. Sibelius sinfonia-sortzaile handietan azkenetakoa da, eta gutxi interpretatzen diren bi sinfoniekin erakutsiko du orkestrak: 3. Sinfonia, argi-sinfonia bezala hartua, eta 4. Sinfonia, iluntasun-sinfonia bezala. Doinu ahaztezinez eta indar handiko erritmoz betetako bi lan dira, Sibeliusen musika osoan ohikoa den bezala.