Lila Downs kantari mexikarrak emanaldia eskainiko du lehenengoz Baluarten heldu den urriaren 14an, ostiralarekin, arratsaldeko 20:30ean hasita, Volver Tour biraren baita. Downs Mexikoren eta Amerikako Estatu Batuen arteko mugako ahotsa da; muga krudela bizimodu hobearen bila doazen hainbat etorkinentzat, baina, aldi berean, kultur mestizaje guztiz interesgarriaren iturria. Gaztelaniaz eta ingelesez abesteaz gain, Mexikoko hizkuntza indigenak (mixtekera, zapotekera, maiera, nahuatla) ere erabiltzen ditu bere lanetan. Mexikoko musika tradizionala blues, jazz, soul, afrikar musika, eta baita klezmer musikarekin ere, fusionatzen du.

In&Out Music Live ekoizleak antolatutako kontzerturako sarrerak 37 eta 40 eurotan ohiko kanaletan eskura daitezke: Baluarteko txartel-leihatilan eta www.baluarte.com web-orrian. Emanaldia SÉS kantautore galiziarrak zabalduko du. 

 

Lila Downsek 1999an kaleratu zuen La sandunga, bere lehenbiziko albuma, baina nazioarteko arrakasta 2001ean erdietsi zuen, La Línea diskoarekin. 2002an Frida pelikularen soinu bandako zenbait kanta grabatu zituen. Una Sangre-rekin 2005eko folk disko onenaren Grammy Latinoa irabazi zuen. Kepa Junkeraren Etxea diskoan (2008) parte hartu zuen Haurtxo Polita abestia kantatuz.