Baluarteko Areto Nagusiak Don Perlimplín operaren estreinaldia hartuko du bihar, arratsaldeko 20.00etan, Nafarroako Ganbera Operak eta Baluarte Fundazioak elkar-lanean ekoiztu duten lehen izenburua, bi erakundeek berriki aurkezturiko lankidetza hitzarmenaren baitan. Larunbatean ere taularatuko den proiektu liriko berri hau Federico García Lorcaren Amor de Don Perlimplín con Belisa en su jardín lanean oinarritzen da; musika Vicent Egeak sortu du, eta libretoa, berriz, Pablo Valdések. Gainera, ikuskizunean ere Nafarroako Orkestra Sinfonikoak, Kukai Dantzak eta Nafarroako Dantza Eskolak parte hartuko dute, beste talde artistiko batzuen artean. Sarrerak Baluarteko leihatilan eta www.baluarte.com web-orrian salgai daude, 22 eta 33 euro bitartean. Hogeita hamar urtetik beherakoek gutxiago ordainduko dute, 13 eta 22 euro bitartean, Gazte Txartela aurkeztuz.

 

Don Perlimplín lan dramatiko laburra da; zenbaitetan, komikoa eta ironikoa, bai eta misteriotsua ere. Ekoizpenean sei pertsonaia ageri dira gehi bat gehiago: ilargia, funtsezko elementua baita Lorcaren lanean, maitasunaz eta askatasunaz mintzo zaiguna, eta batez ere, gizakiarengan gertatzen den aldaketaz, jendea bere mugak gainditzeko gauza denean. Istorioak gizon zahar baten eta neska gazte baten arteko ezkontzatik datozen arazoak ditu kontagai: emazte ezkondu berriaren –Belisaren– fideltasunik eza, ezkontza gauean ere bost gizonekin engainatuko baitu senarra, bi iratxok haren okerkeria estaltzen duten bitartean.  Neska maiteminduko da bere balkoipean maiz burua estalita paseatzen ibiltzen den pertsona batez, haren aurpegia ikusi gabe ere. Behin batean, gizon misteriotsu harekiko amodio grina aitortuko dio senarrari berari, eta senarrak laguntza emanen dio emazteari bi gazteak etxeko lorategian elkartu daitezen. Senarraren egiazko asmoa, ordea, mutil gazte hori (senarra bera da) hiltzea da.